Bung…
Jenengmu cinathet nandhes ing lembaraning sejarah bangsa
iki
Jeneng kang prasaja
Nanging bisa gawe giris miris kolonialis Inggris
Kang siyunge mengingis mingis-mingis
Bung…
Semangatmu kang makantar-kantar nalika semana
Kuwawa ambrastha durangkara penjajah Walanda
Satemah kekitrang nunjang palang ngoncati bumi Nuswantara
Kang telung atus seket taun kalindhes katindhes
karudapeksa
Bung…
Budi dayamu kang tanpa kendhat
Kasil ngrebut kamardikaning bangsa
Senajan tinumbal ewoning nyawa para pejuwang
Njrebabah ndhepani bantala
Kanthi esem ikhlas lila legawa
Nanging Bung…
Lakune sejarah bangsa iki nate di gliwarake
Dening panguwasa kang rumangsa paling bisa
Jasamu nedya kinubur
Bebarengan karo ragamu
Ah Bung…
Upama aku kuwawa nggugah anggonmu sare
Sayekti aku kepengin nyuwun pirsa
Ngenani impenmu nalika mudha tumaruna
Ngenani piwulangmu kang tansah nengenake
Kamulyaning para kawula
Ngenani tekadmu kanggo nentremake kahanan donya
Bakal tak critakake marang anak putu
Menawa mbiyen tau mijil ing jagad Nuswantara
Proklamator pahlawaning bangsa
kang seda kanthi siniya siya
dening panguwasa kang nuranine wis wuta
Bung…
Sewidak sanga taun Republik iki Mardika
Nanging kahanan ora kaya impenmu duk semana
Mbaka siji Bumi Pertiwi di grogoti
Nasionalisme saya luntur ketrajang erosi
Bhineka Tunggal Ika lan Pancasila apa isih sekti?
Saiki kang kaesthi malah ngrembakane laku cidra
Arta lan bandha para kawula jinarah rayah dening para
panguwasa
Martabat lan karakter bangsa wis ilang musna
Cinaplok nafsu angkara murka
Kang sinembah sembah
Satemah lali purwa duksina
Ah Bung…
Pungkasane guritan iki
Aku mung bisa caos atur
Kepenakna anggonmu sare
Umure jagad iki
Mbok menawa wis ora suwe
No comments:
Post a Comment